Rruga Xhon Kenedi në Çair për më pak se dy muaj do të marrë pamje të re. Nga sot, ekipet e Qytetit të Shkupit po riparojnë këtë rrugë të rëndësishme, në pjesën nga bulevardi Brigada maqedonase-kosovare deri te bulevardi Hristijan Todorovski Karposh. Në periudhën e ardhshme, në këtë pjesë do të ndërtohen edhe shtigjet e biçikletave, do të zëvendësohen edhe skajoret e dëmtuara, si dhe pusetat dhe ulluqet ekzistuese do të nivelizohen, në gjatësi prej 1.123 metrash.

Pas rikonstruksionit, rruga Xhon Kenedi do të jetë rruga e 5-të në territorin e Çairit me shtigje biçikletash të formuara, pas rrugëve Kemal Sejfulla dhe Brigada e dytë maqedonase dhe bulevardet Hristijan Todorovski Karposh dhe Bosnjë dhe Hercegovina.

- Kemi pranuar reagime pozitive nga qytetarët e pjesës veriore të Shkupit, përveç rikonstruksionit të rrugës Xhon Kenedi, javën e ardhshme do të fillojmë me rindërtimin e rrugës së Brigada mqedonase-kosovare. Bulevardi Hristijan Todorovski Karposh tashmë është ndërtuar, bulevardi Bosnje dhe Hercegovina është në ndërtim e sipër dhe është ndërtuar një rrethrrotullim në Çair - me një qëllim, si strategji e qytetit, për të siguruar zhvillim të ekuilibruar të infrastrukturës sepse kjo pjesë e Shkupit ishte jashtë planeve për çfarëdo veprimi. Kur është fjala për infrastrukturën, të gjithë qytetarët e Shkupit duhet të kenë të njëjtat kushte - tha sot kryetari Petre Shilegov.

Vlera e projektit për rikonstruksionin e rrugës Xhon Kenedi  është rreth 25.8 milion denarë, ndërsa afati i ndërtimit është 40 ditë.

Shilegovi u bëri thirrje qytetarëve që të tregojnë durim derisa të kryhen punimet ndërtimore në këtë pjesë dhe të respektojnë regjimin e përkohshëm të trafikut.

Në fillimin e punimeve për rikonstruksionin e rrugës Xhon Kenedi, ishte i pranishëm edhe nënkryetari i Qytetit të Shkupit, Enver Maliqi.