Në adresën elektronike për komunikimin me qytetarët 24@skopje.gov.mk deri më tani kanë arritur 1.893 kërkesa, nga të cilat janë zgjidhur 1.638. Shumica e qytetarëve në këtë e-mail kanë raportuar probleme nga fusha e komunikacionit, çështje të lidhura me tatimin mbi pronën, si dhe kërkesa të lidhura me sektorin komunal, krasitjen e degëve të thata, prerjen e drurëve të vjetër dhe të thatë dhe rregullimin e hapësirave të gjelbra. Një pjesë e kërkesave të qytetarëve kanë të bëjnë dhe me ndarjen e subvencioneve për kondicionerë inverter, biçikleta dhe trotinete elektrike.

Në adresën elektronike 24@skopje.gov.mk qytetarët mund të raportojnë probleme nën kompetencat e Qytetit, ndërsa administrata e Qytetit është e obliguar t’u përgjigjet kërkesave në një afat nga 24 deri në 72 orë. 

Qëllimi i këtij projekti është puna efikase dhe me efektivitet e administratës së Qytetit në shërbim të qytetarëve, e cila do të kontribuojë që Shkupi të jetë një qytet funksional i cili ofron shërbime të shpejta, cilësore dhe në kohë për shkupjanët. Me  një mënyrë të tillë komunikimi Qyteti i Shkupit bëhet më i afërt për shkupjanët dhe ka si synim që nëpërmjet komunikimit të drejtpërdrejtë me qytetarët të zgjidhë  problemet e përditshme me të cilat ballafaqohen.