Kryetarja e Qytetit të Shkupit, Danela Arsovska dhe kryetari i Komunës së Butelit, Darko Kostovski, inspektuan punët ndërtimore për rikonstruksionin e rrugës “Skoevska” në lagjen Radishan, të cilat filluan një muaj më parë.

- Sot inspektuam aktivitetet ndërtimore në rrugën “Skoevska”, rikonstruksioni i së cilës parashikon rindërtimin e rrugës dhe rregullimin e parterit dhe gjelbërimit për herë të parë pas 4 dekadash, gjë me të cilën përmirësohet siguria dhe lëvizja për pjesëmarrësit në komunikacion dhe mundësohet infrastrukturë rrugore adekuate - tha kryetarja Arsovska.

Ajo shtoi se Qyteti do të vazhdojë me aktivitetet në terren dhe realizimin e projekteve infrastrukturore me qëllim tejkalimin e problemeve dhe sfidave shumëvjeçare me të cilat ballafaqohen shkupjanët.

Projekti parashikon rikonstruksionin e plotë të rrugës automobilistike dhe tre degëve të saj, me gjatësi të përgjithshme rreth 1.800 metra dhe gjerësi 6 metra, nga kryqëzimi me rr. “Gjore Gjorevski” deri te kryqëzimi me rr. “Radishanska”, si dhe  rregullimin e parterit dhe gjelbërimit.