Inspektorati i Qytetit të Shkupit, përveç kontrolleve të përforcuara, organizoi edhe kujdestari të rojeve komunale të qytetit në lokacionin përballë East Gate Mall, ku periudhën e kaluar qytetarë të pandërgjegjshëm, kanë hedhur mbeturina dhe janë krijuar deponi ilegale.

Këto ditë, rojet komunale të Qytetit në vendngjarje kanë gjetur 4 shkelës dhe ndaj tyre janë shqiptuar dënime përkatëse ligjore. Ekipet e NP Higjiena Komunale menjëherë kanë larguar mbeturinat, dhe hapësira është pastruar plotësisht.

Apelojmë që mbeturinat të hidhen në kontejnerët e mbeturinave, në të kundërtën do të vijojnë sanksione përkatëse sipas Ligjit për pastërti publike. Çdo hedhje e mbeturinave në sipërfaqet publike është shkelje e Ligjit për pastërti publike dhe ndikon në ndotjen e mjedisit jetësor.