Në seancën e sotme, të katërt, të Këshillit Drejtues të Bashkësisë së Njësive të Vetëqeverisjes Lokale (BNJVL), njëzëri u votua kërkesa për takim urgjent me Qeverinë me qëllim gjetjen e zgjidhjes për problemet e shkaktuara nga kriza energjetike. 

Që atje theksojnë se kërkohet të realizohet takim i anëtarëve të Këshillit Drejtues të BNJVL-së me kryeministrin e Qeverisë, Dimitar Kovaçevski dhe me drejtuesit e dikastereve që janë të lidhura drejtpërdrejtë me ballafaqimin me pasojat nga kriza energjetike.

Bëhet fjalë për një problem të madh për të cilin kryetarët e komunave kanë paralajmëruar prej kohësh për rritjen e shumëfishtë të faturave të energjisë elektrike, dhe në disa komuna edhe me mbi 500 për qind në krahasim me faturat para fillimit të krizës. Përfaqësuesit e BNJVL-së kërkuan reagimin në kohë nga ana e Qeverisë për tejkalimin e kësaj situate, duke potencuar se nëse kjo gjë nuk ndodh së shpejti, do të vihet në pikëpyetje jo vetëm funksionimi i komunave, por edhe i ndërmarrjeve publike dhe institucioneve arsimore dhe kulturore nën kompetencat e tyre.

Në takim u diskutua edhe për gjendjen e përgjithshme financiare të komunave, ku BNJVL edhe njëherë konfirmoi qëndrimin se për një pavarësi më të madhe financiare  është e nevojshme rritja e mjeteve financiare nga dotacionet dhe përqindje më e madhe nga tatimi personal mbi të ardhurat, si dhe tatimi mbi vlerën e shtuar.