Kushte më të mira pune dhe vlerësim real i punës së shoferëve të autobusëve. Këtë theksoi drejtori i ndërmarrjes publike Ivan Ilievski në ditën e shënimit të 74 vjetorit të formimit së NTP-së Shkup.

“Problemi me personat që janë angazhuar për vite me radhë nëpërmjet punësimeve të përkohshme duhet të zgjidhet dhe ata duhet të marrin statusin e të punësuarit në kohë të pacaktuar. Puna duhet të vlerësohet në mënyrë adekuate dhe NTP-ja përfundimisht të bëhet një ndërmarrje ku punëtorët do të jenë krenarë që janë pjesë e saj”, tha Ilievski.

Për drejtorin e NTP-së Ilievski ky vit do të jetë viti i rimëkëmbjes së ndërmarrjes e cila për vite me radhë nuk është menaxhuar mirë.

“Këtë vit do të kryhet riorganizimi dhe kursimi i mjeteve. Do të jetë një vit i vështirë për shkak të çmimeve të karburanteve, por ne duhet të jemi të suksesshëm që përfundimisht kjo kompani të jetë një servis i vërtetë për qytetarët. Problemi është se 4 vitet e fundit janë akumuluar borxhe dhe askush nuk është kujdesur për atë se si funksionon NTP-ja. Prandaj po fillojmë t'i vendosim gjërat në një sistem i cili do të funksionojë”, shtoi drejtori i NTP-së, Ivan Ilievski.

Në manifestim mori pjesë edhe kryetarja e Qytetit të Shkupit, Danela Arsovska, ndërsa me rastin e shënimit të 74-vjetorit të NTP-së u ndanë çmime dhe falënderime për përvojë pune mbi 40 vjet për Vesna Apostoloviq, Ajten Hazir, Tërpe Kostadinovski, Vanço Stojçeviq, Zoran Spasovski, Momçilo Dodevski dhe Dushko Dimovski.