“Në 10 muajt e fundit jemi përpjekur të gjejmë një zgjidhje sistemore me të cilën do të parandalojmë përsëritjen e problemeve të hasura në të ardhmen. Si një nga shembujt e projekteve problematike, mund të përmend bulevardin te “ASNOM”, projektin te bulevardi “Kiro Gligorov”, “Jeseninova”, “Vasko Karangelski”. Këto janë projekte që kanë filluar por nuk mund të përfundojnë për një kohë të shkurtër sepse janë lënë me një numër të madh çështjesh të pazgjidhura. Kjo do të thotë se nuk ka pasur një planifikim të mirë dhe adekuat, ka marrëdhënie të pronësisë juridike të pazgjidhura, dhe këto nuk janë vetëm shpronësime, por edhe konteste ndërmjet të afërmve që duhet të zgjidhen ligjërisht”, tha kryetarja e Qytetit të Shkupit, Danela Arsovska, në emisionin “Verë e nxehtë politike” në televizionin Kanal 5, ku ishte e ftuar, e pyetur se deri ku janë aktivitetet e Qytetit për përfundimin e projekteve tashmë të nisura nga udhëheqja e mëparshme e qytetit.

Për ndërtimin e bulevardit te “ASNOM”, i cili duhet t'i lidhë qytetarët e Gazi Babës me komunën e Aerodromit, Arsovska theksoi se ky është projekti me numrin më të madh të problemeve me të cilat është ballafaquar Qyteti në periudhën e kaluar.

“Këtë projekt e kemi gjetur vetëm me rreth tridhjetë çështje të zgjidhura të marrëdhënieve të pronësisë juridike nga gjithsej 275. Për rreth 5 muaj kemi arritur të zgjidhim më shumë se 150 nga këto çështje, por një pjesë e mirë kanë mbetur dhe pikërisht për këtë jemi të fokusuar dhe po punojmë në këtë moment. Është një nga ato zgjidhje sistemore që janë planifikuar dhe ne do të bëjmë çmos që të mos përsëriten më kurrë problemet me të cilat po ballafaqohemi në këtë moment. Aktualisht po zgjidhim problemet e mbetura nga udhëheqja e mëparshme. Tashmë të gjitha projektet po planifikohen në mënyrë adekuate, paraprakisht, po zgjidhen problemet me pronësinë juridike dhe shpronësimet para fillimit të projektit, në mënyrë që kur të fillojë të zgjidhet në një periudhë sa më të shkurtër kohore dhe të mos jenë pjesë e rrugëve dhe bulevardeve në këtë gjendje që janë sot”, thotë Arsovska.