Në përputhje me Ligjin për Mbrojtjen e të Drejtave të Pacientëve, Qyteti i Shkupit formon Komisionin e Përhershëm për Promovimin e të Drejtave të Pacientëve, në përputhje me dispozitat ligjore nga fusha e qeverisjes vendore. Për këtë qëllim, Qyteti i Shkupit shpalli Thirrje publike për angazhimin e anëtarëve në Komisionin për Avancimin e të Drejtave të Pacientëve.

Komisioni përbëhet nga njëmbëdhjetë anëtarë, përkatësisht: dy përfaqësues të pacientëve - anëtarë të shoqatave të pacientëve, dy përfaqësues të shoqatave që merren me të drejtat e njeriut dhe iniciativat civile, një përfaqësues nga një shoqatë që merret me të drejtat e grave, një përfaqësues nga shoqatat për mbrojtjen e të drejtave të personave me aftësi të kufizuara, dy mjekë nga komunat dhe tre anëtarë të deleguar nga Këshilli i Qytetit të Shkupit.

Mandati i anëtarëve të komisionit është dy vjet, me të drejtë edhe të një mandati të njëpasnjëshëm.

Detyrat e punës të anëtarëve të Komisionit:

 

- Pjesëmarrje e rregullt dhe aktive në seancat e komisionit;

- Përgatitja dhe zbatimi i Planit të punës së komisionit me afat kohor;

- Përgatitja e Rregullores së punës së komisionit, si dhe akteve të tjera;

- Monitorimi dhe vlerësimi i gjendjes me mbrojtjen e të drejtave të pacientëve;

- Shqyrtimi i ankesave të pacientëve dhe propozimi i masave për përmirësimin e mbrojtjes së të drejtave të pacientëve tek autoritetet kompetente;

- Përgatitja dhe nxjerrja e Raportit për mbrojtjen e të drejtave të pacientëve para Këshillit të Qytetit të Shkupit,

- Përgatitja e materialeve informative, promovuese dhe materialeve të tjera me qëllim avancimin e të drejtave të pacientëve;

- Realizimi i aktiviteteve tjera për avancimin e të drejtave të pacientëve dhe mbrojtjen e tyre.

 

Në Thirrjen publike mund të aplikojnë organizata të shoqërisë civile që duhet të emërojnë nga një përfaqësues të vet për anëtar të komisionit, ku organizatat duhet të trajtojnë çështje nga fusha e të drejtave të pacientëve, të drejtave të njeriut dhe iniciativave civile, të drejtave të grave dhe mbrojtjes së të drejtave të personave me aftësi të kufizuar. Në Thirrjen publike mund të aplikojnë edhe individë të cilët janë me profesion mjekë ose nga profesione të tjera.

Vlerësimin e propozimeve të depozituara do ta bëjë Komisioni për Verifikimin e çështjeve të mandatit, mirënjohjeve, parashtresave dhe ankesave, pas së cilës paraqet propozim pranë Këshillit të Qytetit të Shkupit.

Afati i fundit për dorëzimin e aplikacioneve është 13.05.2022, deri në orën 16:00.

Aplikacionet me dokumentacionin e plotë të skanuar depozitohen me e-mail, në adresën: pravanapacienti@skopje.gov.mk (me shënimin - Aplikim për Thirrje publike).