Градоначалничката на Град Скопје, Данела Арсовска, Секретарот на Град Скопје, Зоран Глигоров и Директорот на ЈП Водовод и канализација - Скопје, Драган Илиевски, во пресрет на одбележување на Светскиот ден на водата, 22 март, присуствуваа на церемонијата за потпишување грант во вредност од 69,784,283 € за изградба на пречистителна станица во Скопје, проект означен како најголем еколошки капитален проект за Скопје кој со поддршка на Европската Делегација, Европската Банка за Обнова и Развој, Европската Инвестициона Банка и Инвестиционата рамка за Западен Балкан (WBIF) – ИФИ Канцеларијата за координација (IFICO) ќе овозможи третман на урбаните отпадни води согласно ЕУ стандардите.

На церемонијата на потпишување присуствуваа и вицепремиерот Бојан Маричиќ, Н.Е. Дејвид Гир, Амбасадор на Европската унија во Македонија, Лилјана Павлова, заменик претседател на Европската инвестициска банка, Фатмир Бесими, министер за финансии, Каја Шукова, министер за животната средина.

Пречистителната станица ќе биде една од најсовремените пречистителни станици за третман на отпадни води во регионот. Истата ќе биде во согласност со главните критериуми од постојните и предложените европски директиви за отпадни води и може да се очекува да обезбеди софистициран третман на отпадните води од градот. Значително ќе го подобри квалитетот на водата во реката Вардар и животната средина. Одредбата за одржливост во однос на користењето на енергијата е особено импресивна. Се очекува дека пречистителната станица ќе биде самоодржлива од аспект на потрошувачка на електрична енергија, дополнително ќе може да произведе и вишок енергија која би се продавала на националната електрична мрежа.

Градот Скопје ја цени улогата и заложбата на Европската инвестициска банка, Европската Банка за обнова и развој како и на институциите на Европската Унија во насока на обезбедување и подобрување на квалитетот на живот на сите граѓани на Р.Маекдонија како и на граѓаните на градот Скопје. Со овој проект се овозможува интегрирано управување со отпадните води чија Европска посветеност лежи во поддршката на глобалните, регионални и локални визии за одржлив развој.

Градот Скопје е одговорна институција, институција во која важат законите, процедурите и системските решенија наспроти политичките манипулации и инсинуации. Граѓаните на градот Скопје имаат право да живеат во модерен град во кој сите имаат еднакви можности.