Градоначалникот на Град Скопје, Петре Шилегов, претседателот на Советот на Град Скопје, Љубица Јанчева и членот на Советот на Град Скопје, Билјана Секуловска-Габер денеска /03.11.2017 година, петок/ остварија средба со заменик градоначалникот на Љубљана, Тјаша Фицко.

Заменик градоначалничката Фицко му го честиташе изборот на градоначалникот Шилегов, со желба за успешна работа и проширување и продлабочување на соработката меѓу двата збратимени града.

Дополнително, Фицко на средбата упати покана до градоначалникот Шилегов да ја посети Љубљана и да оствари средба со градоначалникот Зоран Јанковиќ во рамки на годишната средба на Еуроситис (Eurocities), мрежата на европски градови која оваа година ќе се одржи во Љубљана во период од 15-ти до 17-ти ноември.

На средбата беше изразена взаемната желба за продолжување на одличната соработка помеѓу двата града и продлабочување на истата, пред се со сферите на урбаниот развој на градовите, управувањето со отпад, користењето на ЕУ фондовите, соработката на повеќе европски проекти, како и продлабочување на соработка на Советите на двата града.

Со цел размена на искуства во сите овие полиња, беше договорена посета на град Љубљана, која би се реализирала до крајот на годинава,  и поединечните проекти од кои Град Скопје сака да собере искуство од Љубљана.

Г-ѓа Тјаша Фицко е заменик градоначалник на Градот Љубљана од 2010 година  и член на Извршниот Одбор на најголемата Европска мрежа на градови EUROCITIES.