Градоначалничката на Град Скопје, Данела Арсовска, министерот за локална самоуправа, Горан Милевски, евроамбасадорот Дејвид Гир, амбасадорката на Швајцарија, Вероника Хулман Марти, амбасадорот на Албанија, Фатос Река и голем број градоначалници, денеска учествуваа на конференцијата за потпишување  договорите за ко-финансирање и поддршка на проекти во рамките на две програми за финансирање од страна на Европската Унија (ЕУ).

Градоначалничката Арсовска во име на Град Скопје, го потпиша договорот за реализација на европскиот  проекот Re-Construct, за креирање и управување екосистем за имплементација на циркуларен модел за справување со градежен отпад. Проектот е финансиран од ЕУ преку ИПА програмата за општини и истиот ќе се одвива во времетраење од три години.

- Со помош на овој пилот проект за прв пат некоја единица на локална самоуправа ќе го отвори прашањето со третирањето на градежниот отпад и шут од уривање, изнаоѓање на начини за негова иновативна пренамена и негова повторна употреба. Главната цел на овој проект е да се зголемат и подобрат капацитетите на Град Скопје за транзиција кон циркуларна економија и одржлива реупотреба на градежен отпад – изјави Арсовска.

На полето на подобрувањето на услугите преку иновативни концепти од проектот „ЕУ за општините“ поддршка ќе добијат 8 единици на локалната самоуправа, додека во рамките на прекуграничната соработка од ИПА програмата на ЕУ ќе бидат поддржани 11 проекти на единиците за локалната самоуправа од три плански региони заедно со нивните партнер општини од Република Албанија.