Градоначалникот на Град Скопје, Коце Трајановски, денеска /02.09.2016 година, петок/ оствари средба со амбасадорот на Кралството Шпанија во Република Македонија, Н.Е. Рамон Абароа Каранза (Ramón Abaroa Carranza).

На средбата амбасадорот Каранза изрази длабоко сочувство за жртвите од поплавените подрачја од големото невреме кое на 6-ти август го зафати скопскиот регион. Тој додаде дека Кралството Шпанија зеде активно учество во справувањето со надминувањето на штетите во форма на донации.

На средбата се дискутираше за досегашната соработка на Република Македонија со Шпанија, како и конкретната соработка помеѓу единиците на локалната самоуправа од двете држави, при што се заклучи дека е потребно нејзино интензивирање, пред се во областа на економската соработка.

Од 2008 година Градот Скопје е збратимен со Градот Сарагоса.