Над 700 млади фудбалери присуствуваа на свеченото отворање на третото издание на Меѓународниот младински турнир во фудбал „Скопје Куп 2016“, кое се одржа вчера /05.08.2016 година, петок/ на плоштадот „Филип Втори“.

Меѓународниот младински турнир во фудбал „Скопје Куп 2016“ за отворен го прогласија градоначалникот на Град Скопје, Коце Трајановски и генералниот секретар на Фудбалската федерација на Македонија, Филип Поповски.

- Чест е да се биде домаќин на еден ваков масовен и квалитетен фудбалски турнир, третиот „Скопје Куп“, особено кога станува збор за интернационален младински турнир со околу 700 натпреварувачи коишто ни доаѓаат од Србија, Хрватска, Бугарија, В. Британија и домаќинот Македонија. Верувам дека, како и минатите две години, во наредните 7 денови љубителите на фудбалот ќе имаат пријатна можност да уживаат во вештините на фудбалерите родени 2000 и 2002 година. На сите учесници и на нивните фудбалски педагози им пожелувам среќа и фер – плеј игра, секако и пријатен и незаборавен престој и дружење во главниот град на Република Македонија – кажа градоначалникот Трајановски.

Турнирот ќе трае до 11 август 2016 година, а  на фудбалскиот турнир ќе учествуваат 28 екипи од Македонија, Србија, Хрватска, Бугарија и од Велика Британија, поделени во две категории (фудбалери родени 2000 година и помлади и 2002 година и помлади). Од македонските екипи, на овој турнир ќе учествуваат Вардар-Скопје,  Металург-Скопје, Шкендија-Тетово, Беласица-Штип, Академија Пандев-Струмица, а од екипите од регионов силите ќе ги одмерат: Партизан, Војводина и Реал Ниш од Србија, Ботев Пловдив и Септември од Бугарија, Сесвете, Осјек и Буба мара од Хрватска  и Про тач од Велика Британија.

Натпреварите ќе се одиграат на 5 фудбалски терени, односно на стадионите: Илинден 1, Горче Петров, ФФМ, Цементарница и Илинден 2.

Скопје за реализација на овој значен меѓународен младински турнир во фудбал „Скопје Куп 2016“ од буџетот издвои 170. 000 денари.