Градоначалникот на Град Скопје, Коце Трајановски, денеска /09.09.2016 година, петок/ оствари средба со делегација од Комисијата за економска експанзија на департманот Val d Oise (CEEVO), Франција, предовдена од претседетелот на комитетот, Филип Суер (Philippe Sueur).

Во рамките на делегацијата на средбата беа и директорот на Комисијата за економска експанзија на департманот Val d Oise, Жан Франсоа Бенон (Јean-Francois Benon) и Медеја Спасова (Medeya Spasova), како и економскиот промотор на Република Македонија во Париз, Игор Николов, претставникот од амбасадата на Република Македонија во Франција, Габриел Атанасов и претставникот од Министерството за странски инвестиции, Александар Чамински.

Градоначалникот Трајановски на гостите од Франција им посака  добредојде и убав престој во Скопје. За време на средбата, Градоначалникот Трајановски се осврна на досегашната соработка меѓу Градот Скопје и збратимените градови од Франција, Рубе и Дижон, а ги потенцираше и поволните можности за инвестирање во Република Македонија.

Претставниците од Комисијата за економска експансија на департманот Val d Oise (CEEVO) изразија интерес за економска соработка особено во областа на малите и средните претпријатија, а посочија и дека во наредниот период ќе извршат сондирање на локалните компании во насока на можностите за инвестирање.

Департманот Val d Oise е еден од најбогатите во регионот на Париз, со три аеродроми меѓу кои аеродромот Шарл де Гол и Бурже и со значителна економска активност со официјално регистрирани околу 4000 компании.