Денеска /13.06.2016 година, понеделник/ во хотел Арка, во организација на Град Скопје и Програмата за развој на Обединетите нации (УНДП), се одржа работилница на која се дискутираше за изработката на Стратегија за климатски промени на Град Скопје.

Оваа работилница се организира како активност во рамки на Проектот „Зголемување на урбаната отпорност  со употреба на ИКТ за вклучување на намалување на ризикот од катастрофи  и климатски промени во Ерменија, Македонија и Молдавија“.

На денешната работилница учествуваа претставници од Град Скопје, ЈП „Паркови и зеленило“, Програмата за развој на Обединетите нации (УНДП), Управата за хидрометеролошки работи на Македонија, универзитетски професори и експерти од оваа област.

Проектот „Зголемување на урбаната отпорност  со употреба на ИКТ за вклучување на  намалување на ризикот од катастрофи  и климатски промени во Ерменија, Македонија и Молдавија“ има за цел изградба на отпорност спрема природните и климатските катастрофи во трите држави преку зголемување на институционалниот капацитет, мобилизација на знаењето и трансферирање на соодветните, најдобри во праксата, иновативни технологии.

Во рамките на проектот се рализираат активности за изработка на Стратегија за климатски промени на Град Скопје, која во себе ќе вклучи дел за намалување (митигација), дел за приспособување (адаптација), како и преглед на преземените мерки од градот и препораки со акциски план.