Градоначалникот на Град Скопје, Коце Трајановски, денеска /24.04.2016 година/ го означи почетокот на градежните работи за проширување и реконструкција на булеварот Христијан Тодоровски Карпош, на потегот од булеварот Џон Кенеди до улицата Рокомија, како и за поставување улично осветлување на потегот од булеварот Џон Кенеди до улицата Ферид Бајрам.

-       Градот Скопје ја продолжува градежната офанзива. Денеска во општината Чаир ги почнуваме градежните работи за проширување и реконструкција на булеварот Христијан Тодоровски Карпош, на потегот од булеварот Џон Кенеди до улицата Рокомија. Со овој проект, постојниот коловоз на булеварот Христијан Тодоровски Карпош ќе се прошири и ќе добие 4 сообраќајни ленти, по две ленти во секоја насока, на должина од 670 метри. Од левата страна на булеварот, гледано од центарот на градот кон Чаир, ќе се изгради тротоар со ширина од 4 метри. Од десната страна на коловозот ќе се оформи заштитно зеленило со променлива ширина, велосипедска патека со ширина од 2,25 метри и пешачка патека со ширина од 2 метра. Градежните работи на булеварот Христијан Тодоровски Карпош ќе се искористат за да се постави нова атмосферска канализација со должина од 280 метри и профил на цевките од 400 милиметри, која ќе се приклучи на постојната атмосферска мрежа. Се планира да се изгради и нова фекална мрежа на должина од 255 метри, како и нова водоводна мрежа на должина од 850 метри – рече денеска градоначалникот Трајановски.

Трајановски додаде дека по должината на булеварот Христијан Тодоровски Карпош ќе се постави и ново улично осветлување, на потегот од булеварот Џон Кенеди до улицата Ферид Бајрам, на должина од 940 метри. На овој потег ќе се постават 63 столба за улично осветлување високи по 10 метри и 65 светилки со моќност од 250 вати.

-       За реализација на проектот за проширување и реконструкција на булеварот Христијан Тодоровски Карпош, на потегот од булеварот Џон Кенеди до улицата Рокомија и за поставување улично осветлување од булеварот Џон Кенеди до улицата Ферид Бајрам Градот Скопје ќе вложи околу 43 милиони денари. На терен ќе работат екипите на градежната компанија „Бауер БГ“. Градежните работи се очекува да завршат за околу една година. Сакам да нагласам дека реализацијата на овој проект е од големо значење за граѓаните од овој дел од градот, со него ќе придонесеме да се зголеми безбедноста во сообраќајот, да се уреди просторот и да се заштити животната средина – нагласи градоначалникот Коце Трајановски.