Сертификати за успешно завршена обука "Одговор за ургентни медицински ситуации" денеска /19.05.2016 година, четврток/ им беа доделени на 30 нововработените пожарникари во Бригадата за противпожарна заштита на Град Скопје.

На оваа обука нововработените пожарникари во Бригадата за противпожарна заштита на Град Скопје се стекнаа со знаење и вештини за давање на медицинска помош во ургентни ситуации, како што се: идентификација и соодветна реакција на трауми, срцево белодробно оживување (CPR) и реанимација, имобилизација на повредени пациенти и соодветен транспорт, тријажа при  катастрофални несреќи со голем број на повредени лица, реакција при задушување, техники на проверка на пулс и отвореност на дишни патишта, бандажирање и преврски, тимска работа во случај на несреќи и повреди и др.

Обуката "Одговор за ургентни медицински ситуации" траеше две недели, а беше спроведена од страна на невладината организација „Линк Акрос“.

Сертификатите на пожарникарите за успешно поминатата обука им ги доделија Командантот на Бригадата за противпожарна заштита на Град Скопје, Благоја Менковски и директорот на „Линк Акрос“ во Македонија, Џонатан Мангелс.

Командантот Менковски на пожарникатите им го честита успешното завршување на оваа обука, која ќе придонесе на зголемување на нивната спремноста за поуспешно извршување на нивните работни задачи.

Соработката помеѓу Град Скопје и „Линк Акрос“ започна со потпишување на меморандумот за разбирање во 2014 година, а слична ваква обука за 19 пожарникари беше организирана во мај 2015 година.