За првпат оваа година во Македонија се одржа Adobe Certified Associate (ACA) натпревар, на кој учество земаа млади од повеќе средни училишта на Град Скопје, но и студенти. Во денешното финале, победата ја однесе Бојан Секулоски, ученик во трета година во СУГС„Раде Јовчевски Корчагин“, кој ќе ја претставува нашата држава во Флорида, САД на светскиот Adobe Certified Associate шампионат и ќе се бори за титулата најдобар ACA во светот.

Град Скопје како еден од главните поддржувачи и покровители на натпреварот, годинава обезбеди 100 АCA испити за учениците од средните училишта на градот. Натпреварот го реализираше и организираше Certiadria, а компанијата Макпетрол ќе ги покрие трошоците за превоз и престој на победникот и неговиот ментор во Флорида, САД на светскиот натпревар.

Светскиот ACA шампионат во организација на Certiport Inc, е глобално натпреварување кое ги тестира вештините за дизајнирање на учесниците преку Adobe Photoshop, Illustrator и InDesign. Најдобрите натпреварувачи ќе ги претстават своите земји на светското првенство, каде што ќе создадат дизајниран проект за избраниот непрофитен клиент на Certiport.