Мандолинскиот оркестар на Младинскиот културен центар од Скопје под диригентската палка на Ванчо Јовчев, вечер /27 април/,  во 20 часот, во салата „25 Мај“ (Дансинг сала) на МКЦ, со свечен концерт ќе го одбележи својот 35-годишен јубилеј.

Членовите на оркестарот од сите генерации собрани по овој убав повод ќе изведат дела од Бах, Огински, Брамс, Пучини, Марчело, Вагнер, Хрисиќ, Трајковски, Бранѓолица,... како и неизбежното „Македонско капричо“ од Драган Шуплевски.

Солисти ќе бидат: Здравко Ангелов - кларинет, Гонце Богоромова - сопран, Јане Дунимаглоски - тенор и Ана Димовска - обоа.

Мандолинскиот оркестар на Младинскиот културен центар (некогашен Дом на млади „25 Мај“) е основан во 1981 година од академскиот музичар Рамадан Шукри. Низ годините зад диригентскиот пулт застанаа и нашиот врвен диригент Сашо Татарчевски, а на една од турнеите во Португалија како гостин-диригент и Вања Николовски Ѓумар. Во моментов со ансамблот, освојувач на врвни државни и меѓународни награди и признанија, раководи Ванчо Јовчев. Повеќе од 3 децении оркестарот добиваше стоечки овации, освен од домашната, и од публиката во Португалија, Шпанија, Белгија, Полска, Чешка, Австрија, Данска, Шкотска, Унгарија, Словенија, Хрватска, Босна, Србија, Грција, Бугарија,...

Влезот за концертот во четврток е слободен.

Опстојувањето и програмата на Мандолинскиот оркестар на Младинскиот културен центар се реализираат со поддршка од Министерството за култура на Република  Македонија и Град Скопје.