Денеска /29.02.2016 година, понеделник/ се одржа дваесет и третата седница на Координативното тело на градоначалници на Скопје, на којашто се дискутираше на неколку теми, меѓу кои и степенот на реализација на проектите во општините.

На седницата се говореше за процесот за наплатата на данокот на имот во Скопје, подготовките за изработката и дистрибуцијата на решенијата за данок на имот за 2016 година. И оваа година, Град Скопје ќе ги изработи решенијата и истите во текот на месец март ќе бидат дистрибуирани преку Македонски пошти за 7 општини, додека 3 општини, Карпош, Кисела Вода и Сарај годинава сами ќе ги дистрибуираат истите. Покрај решенијата за 2016, се дискутираше и за процесот на наплата за минатите години, каде  што во наредниот период ќе се реализира присилна наплата за неплатениот долг за данок на имот за 2014, а ќе се испратат опомени за 2015 година.

Покрај данокот за имот, на Координативното тело на градоначалници на Скопје  се дискутираше и за процесот на подготовка на регулациони планови за времени објекти и урбана опрема на подрачјето на Град Скопје, како и за посочување на локации од општините за поставување пунктови на ЈП „Водовод и канализација“ и ЈП „Паркови и зеленила“.