Вчеравечер во Младинскиот културен центар почна годинешново издание на  Фестивалот на Креативни Индустрии – „Скопје Креатива“ кој ќе трае до 6 мај, сабота, 2017 година.

„Скопје креатива“ станува омилен урбан културен настан во градов на кој публиката повторно, и оваа година,  ќе има можност за прв пат да ги види уникатните дизајнерски решенија на многубројни македонски компании и самостојни уметници, кои создаваат производи со исклучително квалитетна уметничка и естетска вредност, а од кои нашето општество има индустриски и економски бенефит.

 Под мотото „Креирај, кокреирај!“ – Do Create! Co-create!. во текот на фестивалот  ќе се одржат над 30 настани распоредени во три дена, осносно ќе се одржат  изложби,  работилници, предавања, работилници за деца, за средношколци, за дизајнери... Ќе има и гостувања на врвни светски дизјанерски имиња, кои ќе одржат работилници и предавања во рамки на програмата.

Организаторите на фестивалот при изборот на проекти во прв план ја ставиле оригиналноста и иновативноста на концептот со цел надминување на класичните поделби по области во уметноста, современ пристап во поврзување на нови технологии и дигитални медиуми во уметничкото творештво и други облици на креативно изразување, промоција и активности за подигнување на свеста за значењето на креативните индустрии, поттикнување на претприемничките и бизнис вештини на младите, уметниците и поединци во рамките на креативните индустрии...

Годинава имаме навистина импресивна листа на учесници: Изабела Новотни со Уметноста на кукленото мајсторство, Невена Тодоровска со Мулти-Фан-Акција, Драган Христов со Експериментална унисекс колекција, ХАЕМУС со Розалии – прослава за празникот на розите, Газменд Ајруловски со Виртоскоп, Вера Христовска  со Разгледници од Македонија и многу други креативци.

Во ексклузивниот каталог што е подготвен за фестивалот, граѓаните ќе  можат  да прочитаат  за секој од импресивните проекти што ќе бидат  претставиме на неколку простори во Младинскиот културен центар.

„Скопје Креатива“ е проект под покровителство на Град Скопје, а во организација на ЈУ Конгресен Центар„ Александар Македонски“ - Скопје и претставува  креативен настан кој позитивно влијае врз развој на  креативниот сектор во земјава и регионот, како и бизнис заедницата.

За реализацијата на овој фестивал, Градот Скопје, од својот буџет за 2017 година, издвои средства во висина од 3 милиони денари.

Овој фестивал останува  доследен на претходните изданија и ќе биде од отворен карактер и сите заинтересирани ќе можат да учествуваат во работиниците, а настаните се бесплатни.