Вчера и денеска (19 и 20 јули), во официјална посета на Скопје e Зоран Јанковиќ, градоначалник на главниот град на Словенија, Љубљана.

За време на посетата, Јанковиќ оствари средба со градоначалникот на Скопје Шилегов, каде што дискутираа за досегашната соработка, како и можностите на продлабочување на истата.

 

 

На средбата беше изразена заемната желба за продолжување на одличната соработка помеѓу двата града и продлабочување на истата, пред се во сферите на урбаниот развој на градовите, управувањето со отпад, користењето на ЕУ фондовите, соработката на повеќе европски проекти, како и продлабочување на соработка на Советите на двата града.

 

На средбата градоначалникот Шилегов го запознал Јанковиќ за поголемите капитални проекти кои Градот Скопје планира да ги реализира во наредниов период, како што се изградбата на подземниот тунел под Кале и модернизацијата на возниот парк на јавниот превоз во Скопје со еколошки возила.

 

 

Градоначалникот Јанковиќ денеска претпладне имаше средба  и со премиерот на Владата на Република Македонија, Зоран Заев, на којашто присуствуваше и градоначалникот Шилегов. На средбата тие разговарале  за регионалните и локалните предности кои ги има Љубљана и Словенија како дел од Европската Унија, како и перспективите кои би ги имале Скопје и Македонија доколку станеме дел од Унијата.

 

По состанокот градоначалниците Шилегов и Јанковиќ заедно се прошетаа низ Старата чаршија, една од најпознатите знаменитости на градот Скопје.

 

Скопје и Љубљана имаат богата долгогодишна соработка во многу области, која кулминира со збратимување кое се случи во 2007 година.