Во наредните три дена Град Скопје е домаќин на меѓународниот партнерски состанок и конференција во рамки на проектот METRO CASE финансиран преку програмата на Европска Унија ИПА Интерег.

На настанот учествуваат претставници од девет европски земји, кои преку заедничка работа, размена на искуства и добри практики дискутираат за современите предизвици и решенија поврзани со одржливиот метрополитенски развој, урбаното управување и заштитата на животната средина.

Настанот официјално го отвори г-дин Даме Димитровски Претседател на Советот на Град Скопје, кој во своето обраќање истакна дека метрополитенските предизвици бараат метрополитенско размислување и заедничко делување помеѓу институциите, општините и партнерските организации.

„Скопје, како и многу европски метрополи, не постои изолирано. Воздухот, водата, мобилноста, економските активности и еколошките предизвици не запираат на административните граници. Токму затоа, преку проектот Metro Case градиме институционални мостови за заедничко планирање, координација и носење одлуки засновани на податоци и научни анализи“, истакна Димитровски.

Во своето обраќање, тој нагласи дека проектот претставува можност за институциите да учат, да соработуваат и да создаваат поодржлив, поинклузивен и поодговорен урбан развој, во интерес на граѓаните и квалитетот на живот во метрополитенската област на Скопје.

Во рамки на конференцијата планирани се тематски презентации, работилници и координациски сесии посветени на метрополитенската соработка, управувањето со квалитетот на воздухот, интегрираното урбано планирање и развојот на одржливи и инклузивни градови согласно европските политики и принципите на New European Bauhaus.

Како дел од активностите на проектот, Град Скопје работи на ревизија на LEAP 3 и подготовка на LEAP 4 – Локален еколошки акциски план, во кој ќе бидат интегрирани европски добри практики и иновативни решенија добиени преку соработката со партнерските градови и институции.

„LEAP 3 беше нашиот компас во изминатите години, а преку Metro Case ќе се развива LEAP 4 – нова генерација на локален еколошки акциски план кој ќе ги интегрира европските искуства, современите политики и потребите на идниот развој на Скопје“, беше истакнато во рамки на конференцијата.

Проектот придонесува кон зајакнување на институционалната соработка, подобрување на метрополитенското управување и унапредување на еколошките политики и квалитетот на живот во Скопје и регионот.