Градоначалникот на Град Скопје, Коце Трајановски, денеска /21.03.2016 година, понеделник/ оствари средба со делегација од Торино, Република Италија, како и со амбасадорот на Италија во Република Македонија, Ернесто Масимино Белели.

Делегацијата беше составена со претставници од администрацијата на Градот Торино од сферите на меѓународната соработка, урбанизмот и сообраќајот, претставници на стопанската комора на Торино, како и професори од катедрата за архитектура и дизајн при Универзитетот на Торино (Department of Architecture and Design of the Polytechnic of Torino).

Градоначалникот Трајановски на гостите од Торино им пожела  добредојде и убав престој во Скопје. Тој изјави дека соработката помеѓу Скопје и Торино е на високо ниво, особено по потпишувањето на Договор за пријателство и соработка од 2012 година, а досега се остварени соработки во областа на урбанизмот, сообраќајот, архитектурата и меѓународните проекти.

Амбасадорот Белели истакна дека соработката меѓу Република Македонија и Република Италија е на високо ниво, а одличната соработка помеѓу Скопје и Торино е одличен пример за развивање  на истите и на локално ниво.

Делегацијата од Торино во наредниве два дена ќе оствари повеќе средби и работни состаноци со претставници на повеќе факултети при Универзитетот „Свети Кирил и Методиј“, државни инстутиции и организации.