Градоначалникот Петре Шилегов денеска се сретна со градоначалникот на Тирана, Албанија, Ерион Велиај, кој е во еднодневна посета на нашата земја. На средбата, двајцата градоначалници разговараа за досегашната успешна соработка меѓу Скопје и Тирана и за можностите таа соработка меѓу двата збратимени града да се продлабочи.

На состанокот се зборуваше и за концептот на зелени градови, планирањето на просторот и за урбаната отпорност, актуелни теми кои ги засегаат и двете локални самоуправи.

Шилегов и Велиај дискутираа и за можностите за забрзан економски развој на Скопје и на Тирана и за концептот на паметни градови. Тие разменија позитивни искуства за одржливиот урбан транспорт, инфраструктурните решенија и подигнувањето на комуналната хигиена.

По средбата, двајцата градоначалници возеа велосипеди низ Градскиот парк, го посетија Дино паркот и направија прошетка до новата тартан патека во паркот.

Скопје и Тирана се збратимени од 2016 година и негуваат плодна соработка во повеќе области.