Екипите на ЈП „Комунална хигиена“ денеска почнаа есенска акција за генерално чистење на општината Чаир. Во оваа акција рачно и машински ќе се мијат и метат главните и сервисните улици, ќе се отстрануваат дивите депонии, а ќе се чистат и дворовите на сите образовни институции во оваа скопска општина.

Почетокот на акцијата за чистење на општината Чаир го означија директорот на ЈП „Комунална хигиена“, Абдусамед Шабани, заменик-градоначалникот на Град Скопје, Енвер Малиќи, градоначалникот на општината Чаир, Висар Ганиу и познатиот олимписки шампион во борење - Шабан Трстена, со посета на ООУ „Цветан Димов“, каде што беше организирана екоманифестација и предавање за совесното и правилно постапување со отпадот.

- Јавното претпријатие „Комунална хигиена“ денеска организира активности за чистење на дворовите на основните и средните училишта, како и на дворовите на градинките во општината Чаир. На овој начин, сакаме да ја подигнеме еколошката свест кај најмладата популација, дека хигиената и чистотата зависат од сите нас. Секој со своите постапки може да придонесе за заштита на животната средина, а најдобрата почетна точка е чистењето и одржувањето на хигиената во својот двор и непосредната околина каде што живееме, учиме и работиме - изјави директорот Шабани.